صديقي مكرد، صاحب تعز.. كان يغادر صنعاء الى منطقته في تعز متباهيا برقم لوحة سيارته فاصل واحد وصورة الرئيس السابق ونجله، يتباهى في منطقته وعند تجوله في شوارع تعز وإب..
عام ٢٠١٢، علّق صورا للرئيس هادي حين أدرك أنه رئيس من قبل انتخابه (صوريا كتحصيل حاصل) واصبح يمتدحه باعتباره الرجل المنقذ المخلص.
الاسبوع الماضي، وانا اغادر صنعاء كان مكرد في الطريق امامي إلى تعز..
ركن جانبا عند احدى نقاط تفتيش جماعة الحوثي في اطراف صنعاء.. كان قد حصل -منها او من احد الباعة هناك- على شعار الموت واللعنة..
أخذ يلصق الشعار على بقايا صور ممزقة للرؤساء السابقين.
وقفت وراءه حينما انتهى من تلصيق الشعار، وفيما ضربه براحته بنشوة بعد ان انتهى من الصاقه باحكام، كنت اربت على كتفه من الخلف، فالتفت مندهشا:
- سامي حبيبي.. ورائي ورائي.. يا فضيحتااااه (ويلتفت الى الشعار.. كان يدرك النقطة التي دائما ما تكون محور مزاحنا، وهي محرجة له).
- دولتك يا مكرد.. هذي الايام قدك تهنجم بالصرخة، بعد صور علي صالح وابنه، وبعدها صورة عبدربه.. اييييييه اييبيه.. دنيا..
- الايام دول يا أهييييل، وكل واحد يشل حقه ومن وصل عشاؤه اتشعي..
- الله يعينك.. تعجبني قدرتك على التكيف مع المتغيرات..
- تقرّص العافية واجزع طريقك، وبعدين احنا طالبين الله نقضي مع الماشي، واذا دخلت دخلت سوق العوران اعور عينك مثلهم، وما هلْ شي. وبعدين بيني وبينك الجماعة اصحابنا كثروا به لا انه هادي وقع رئبس رجال واحنا بعده، ولا انه تنازل وسكهنا.. برضه الاصلاحيين والاشتراكيين اشتغلوا بس لاصحابهم.. نفسي نفسي والامر يومئذ لله..
:: طيب والحوثيين..؟!
- مدري على الله.. شنجربهم عادهم للان مدري كيف.. بس تشتي الصدق احنا تعبنا و من تزوج امنا كان عمنا.. خلينا نسكه.. والا ايش رأيك..
:: أحسن لك تحافظ على الوالد، عشان ما تحنب بزواجة الوالدة.. كل شوية وانت منتظر عريس مدوخ او بلطجي يجيلك عم جديد تجربه، وكلما جزع واحد جاء الثاني.. وواحد محلل وواحد وثالث أجير، وواحد شعاره شقضي ولا الغلايب .. هذي ام مش حقل تجارب.
- هذي هله.. بس الصدق تشتي تخزينة عشان نتناقش ونفهم اكثر..
- اي خدمات.. بيننا اتصال.. خاطرك يا مكرد..
