كتب : فهد التركي
* الهو .. كلمه موجوده بذاكرة كل عدني خصوصا الناس القداما من الزمن الجميل ، وكانت هذه الكلمة مصطلح اساسي ومهم في كل اسره وتستخدم كلمة الهو كثيرا خصوصا في حالات تربية الاطفال .. حيث تستخدم لعدة أسباب خصوصا للعيال الزناقل الذي مايسمعوش الكلام ، فتلجئ الأم او الاب لاستخدامها عشان يخاف الطفل ،، مثلا في الحالات التالية :
- عندما يكون الطفل خارج البيت يلعب مع اصحابه = ياولييد هيا ادخل البيت الدنيا ليل بيجيلك الهو
- عندما الطفل لا يرغب بالنوم = او اوووووه حبيبي يله ارقد غمض عيونك بيجيلك الهوووووووو
- و تستخدم الهو في كثير من الأمور عندما يعجز الابوين من موقف معين مع الطفل ،،،،، بل تشتد اساليب التخويف احيانا الى القول (( شوف الهو بايأكلك )) ليتم تخويف الطفل .
* في ذاك الوقت كانت العابنا بسيطة جدا ومتواضعة .. معظم الاطفال يلعبون بالتايرات حق البوابير .. والبعض يستخدم مزارق .. والبعض من الاطفال المدلعين طبعا يالله اهله يشتروا له سيكل بيدل .
لكن بصراحة والحمدلله كنا شطار جدا نلعب للمغرب ونرجع نذاكر دروسنا ونكتب الواجب .
- اما اليوم ياجماعة الخير .. ايش هذا الكلام تغيرت الاوضاع ونشوف حاجات غريبة ومؤسفة جدا بسلوك الاطفال .. نشوف اطفال يسعسعوا في وقت متأخر من الليل في الشوارع ، واطفال اخرين يتناولون الشمة .. واخرين التمبل .. واشيا وسلوكيات كثيره في حياة الاطفال ظهرت مع التطور بمفهوم غلط واصبحت الكثير من الاسر اليوم تترك الاطفال يشاهدون مسلسلات وافلام رومنسيةكلها قصص حب ومحبابه واخرى اكشن حامي الوطيس (( مراد علمدار )) طبعا هؤلاء الاطفال الذيفي البيوت اما البعض الله يستر ،، واصل طول اليوم وهم في محلات النت وتعال ياتصفح علىالمواقع العالمية ( ...... ) تهز الكبار.. كيف الاطفال والمراهقين، وامه وابوه مخزنيين و مكيفين قات ياسلااااااااام سلم ولا حد كماهم .. هم بس عليهم ( .......) والانجاب والتربية على الشارع.
- كما ن في حاجه جديده انتشرت بين اولاد المدارس واولاد الحوافي .. يتعاندوا بينهم البين ويتفاشرواعلى ان اهله اشتروا له (( ايباد )) بعد ما تعطل او تكسر عليه الجوال ابو لمس ، يقوم ابن الجيران هو الاخر يقول لامه يله اشتروا لي (( ايباد )) زي حق منوري .. تقول امه طيب ياعصومي ياحبيبي مافيش معيا دلحين بيس راعي لما نستلم الخيرية .. او باشوف الدلالة لو باتعطيني فوق الهفته باخليها تجيبلك واحد جديد .. لا تزعل ولا شي حبيبي باجيبلك احسن من حقه .
- ياسلااااااااام .. أم حنونه وطيبه جدا تدلع الجاهل دلع عالمي ، بس هدا الجاهل له سبع سنوات بالمدرسة ما يعرف يكتب زي الناس .. حتى الأمومة ياجماعة الخير تغيرت وتطورت امهات ديجتال .
- طبعا الصباح ياجماعة الام والاب راقدين من بعد السمرة والتكييفة حق القات .. وواكنين ان عيالهم راحوا المدرسة يتعلمو ..... العيال مش بالمدرسة .. العيال اكثرهم بمحلات النت هم وشنطهم لما يؤدن الظهر ويروحوا البيت يياكلولهم لقمتين رز وصانونه .. ويله يدبرله حق النت للفترة المسائية ، لا الاهليتأكدوا من اولادهم انهم راحوا المدرسة او عطفوا .. ولا حتى من المدارس تعمل متابعة واستدعاء لأولياءالامور اصبح المجتمع كله مشارك مشاركه فعالة وبطريقة غير مباشرة بسبب هدا الاهمال والانفلات الاسري ويله معظمهم يوصل للصف الثامن .. يعني بعد الامتحان الوزاري باي باي يجلس يكرع بالحافة لانه لا يستطيع يواصل دراسته يشوفها جهنم وانتشرت ثقافة بين الشباب :
(( ياخي ما فيش دراسة زي الناس ))
- اليوم مستوى الاجيال والادب ياسلااااااام اخر حلاوة .. يلعن ابو هذا التطور .. حتى الجهال ما عاد يخافوش من الهوووووووووووو
