كلمات/ ناصر السيد سٌمًن
بطعم المر باقول الحقيقة واسمعوا
لاجل الوطن لازم نقول الحق مهما كان
واحد يشتغل وخمستعشر يلعبوا
والعشرة الباقين عاده وضعهم ما بان
خوفي منًهم دي عادهم مابيًنوا
لايدخلونا في متاهة كان ياما كان
حاجة واحدة ديهم عليها اتوافقوا
وطبقوها كلهم من دونما نقصان
صعقنا يوم شفناهم وهم يتسابقوا
على حقوق الغير شلوها بلا اثمان
جابوا الدحبشة بل عادهم فيها ابدعوا
فاقوا علي محسن وبن لحمر وبن سنحان
تاهوا في مصالحهم وراحوا ينهبوا
من الجباية تاجروا ونافسوا بقشان
طال الوقت واحنا في امل ان يقلبوا
لعوام تجري والجماعة مثلما الطرشان
لعناتي على كل الذين اتدحبشوا
حطوا القضية واهلها في عالم النسيان
نصيحة للنشاما ريتهم بايعقلوا
ويذكرون المعجلة ويذكروا ضبعان
من اجل الجنوب الحر كم دي استشهدوا
وكم من الجرحى وكم اسرى وكم فقدان
كم ايتام من شعبي وكم دي شرًدوا
وكم مجازر عد من تسعين حتى الان
قولي ياعدن وخبريهم لو نسوا
قولي لهم ماحل بك من عصبة الشيطان
قصًي ماحصل لعلهم يستوعبوا
الظلم والتدمير والتهميش والنكران
وعن دور القبائل والمشايخ دي غزوا
احكي لهم بالعيب دي حاكوه في عيبان
باعلا صوت صيحي ايقظيهم يسمعوا
قولي لهم بالله لا تنسون ياخجفان
اذا تشتون دولتكم فلا تتبهذلوا
خلوا التطاول في البقع والنهب والبنيان
بلد محتل وانتوا في الأراضي تعجنوا
افعال شينه هي سبب كوارث الاوطان
شدوا حيلكم واتكاتفوا واترفعوا
خلو الصغائر لأهلها وانتوا لكم شمسان
عدن هي عاصمتكم احرسوها واشمخوا
تاريخها اعرق من الاغريق والرومان
#عدن
30/اكتوبر/2023م
